Op­in­ber geng­is­skrán­ing

Gengi íslensku krónunnar er ákvarðað á innlendum gjaldeyrismarkaði sem er opinn á milli kl. 9:15 og 16:00 hvern virkan dag. Einu sinni á dag skráir Seðlabanki Íslands opinbert viðmiðunargengi krónunnar gagnvart erlendum gjaldmiðlum, til viðmiðunar í opinberum samningum, dómsmálum og öðrum samningum milli aðila þegar önnur gengisviðmiðun er ekki sérstaklega tiltekin, sbr. 29. gr. laga nr. 92/2019 um Seðlabankann, og um leið er skráð opinber gengisskráningarvísitala. Skráningin á sér stað um kl. 14:15 á mið-evrópskum tíma (e. Central European Time) á hverjum degi sem skipulegir gjaldeyrismarkaðir eru almennt starfandi. Viðmiðunargengið birtist opinberlega á heimasíðu bankans um klukkan 16:00 á staðartíma hvern viðskiptadag. Þegar sérstaklega stendur á getur Seðlabankinn tímabundið fellt niður skráningu á gengi krónunnar. 

Frá og með 1. apríl 2026 taka gildi breytingar á daglegri birtingu viðmiðunargengis Seðlabanka Íslands.

Eftirfarandi gjaldmiðlar verða ekki lengur teknir til daglegrar skráningar:

• Nígerísk næra
• Taívanskur dalur
• Súrínamskur dalur
• Jamaískur dalur
• Sádiarabískt ríal
• Kúveiskur denari
   

Sama dag hefst dagleg skráning á eftirfarandi gjaldmiðlum:

• Indónesísk rúpía
• Malasískt ringit
• Rúmenskt lei
• Filippseyskur pesi
   

Markmið breytinganna er að færa fyrirkomulag gengisskráningar nær því sem tíðkast hjá öðrum seðlabönkum í Evrópu.

Frá og með 31. ágúst 2020 hefur Seðlabanki Íslands skráð opinbert viðmiðunargengi um klukkan 14:15 á mið-evrópskum tíma (e. Central European time) til samræmis við verklag sem þekkist í nágrannalöndum. Viðmiðunargengið er birt opinberlega á heimasíðu bankans um klukkan 16:00 á íslenskum tíma hvern viðskiptadag en ekki um klukkan 11:00 eins og áður.

Frá og með 1. apríl 2020 var sú breyting gerð að Seðlabankinn birti eingöngu skráð miðgengi allra gjaldmiðla sem bankinn skráir og er það þá opinbert viðmiðunargengi. Birting á kaup- og sölugengi gjaldmiðla lagðist þá af. Þetta verklag er til samræmis við verklag seðlabanka í samanburðarlöndum. Frétt um breytingar á gengisskráningu Seðlabanka Íslands má sjá á vefsíðu bankans.

Gengi annarra gjaldmiðla en þeirra sem birtast á vefsíðu Seðlabankans má finna á ýmsum vefsíðum, t.d. oanda.com. Seðlabanki Íslands ber enga ábyrgð á upplýsingum sem er að finna á slíkum vefsíðum eða notkun aðila á þeim auk þess sem minnt er á almennan fyrirvara um áreiðanleika upplýsinga á vefnum, samanber það sem segir á síðu um höfundarétt og afsal ábyrgðar.

Hinn 1. febrúar 2018 hóf Seðlabanki Evrópu að skrá gengi íslensku krónunnar að nýju, en því var hætt 3. desember 2008. Gengisskráningu Seðlabanka Evrópu má nálgast á vef Seðlabanka Evrópu.

Seðlabanki Íslands hefur ákveðið að hætta tímabundið að skrá opinbert gengi rússneskrar rúblu gagnvart íslenskri krónu. Ástæða ákvörðunarinnar er sú að Seðlabanki Evrópu (ECB) hefur hætt skráningu á gengi rúblunnar gagnvart evru vegna ríkjandi aðstæðna á markaði fyrir evrur og rúblur, en gengi íslensku krónunnar gagnvart rússnesku rúblunni hefur byggst á gengisskráningu ECB.

Frá og með 1. janúar 1999 varð evran opinber gjaldmiðill, án seðla og myntar, í 11 Evrópulöndum: Þýskalandi, Frakklandi, Spáni, Portúgal, Austurríki, Írlandi, Finnlandi, Hollandi, Belgíu, Lúxemborg og Ítalíu. Í ársbyrjun 2001 bættist Grikkland í þennan hóp. Þjóðmyntir þessara landa voru notaðar til ársloka 2001 en í ársbyrjun 2002 voru gefnir út evruseðlar og myntir sem tóku við hlutverki þeirra. Frá ársbyrjun 1999 hefur hlutfall hverrar þjóðmyntar verið fast gagnvart evru. Þann 1. júlí 2002 lagði Seðlabanki Íslands af formlega opinbera skráningu á gengi gjaldmiðla þessara landa, en samhliða birtingu fréttar þess efnis voru jafnframt birtir reiknistuðlar sem notast skal við þegar reikna þarf út gengi eldri gjaldmiðla út frá gengi evru.

Seðlabanki Íslands lagði af formlega opinbera skráningu eftirtalinna gjaldmiðla á eftirfarandi dagsetningum:

• Maltnesk líra - 1. janúar 2008
• Eistnesk króna - 1. janúar 2011
• Lettneskt lat - 1. janúar 2014
• Litháískt litas - 1. janúar 2015
• Venesúelskur bólivari - 2. júní 2018
• Króatísk kúna - 2. janúar 2023

Leiðrétting 30. desember 2022

Gengi SDR: Í byrjun ágúst 2022 var hlutföllum mynta breytt sem mynda sérstök dráttarréttindi (SDR) Alþjóðagjaldeyrissjóðsins. Til samræmis við uppfærsluna hefur daglegt gengi SDR gagnvart krónu nú verið leiðrétt aftur í tímann, frá 2. ágúst til 8. desember 2022. Næstu breytingar á hlutföllum gjaldmiðla í SDR eru áætlaðar í júlí 2027.

6. janúar 2009

TWI: Hætt var að birta vísitölu gengisskráningar (TWI) í ársbyrjun 2009.