Endurskoðun á gengisskráningarvog krónunnar
Seðlabanki Íslands hefur endurskoðað gengisskráningarvog krónunnar í ljósi utanríkisviðskipta ársins 1998. Slík endurskoðun fór síðast fram í júní 1998. Meðfylgjandi tafla sýnir nýju vogina og breytingar frá fyrri vog. Nýja vogin mun mæla gengisbreytingar frá deginum í dag, 25. júní 1999, þar til næsta endurskoðun fer fram um svipað leyti á næsta ári.
Þegar ný gengisskráningarvog var tekin upp í september 1995 var ákveðið að hún yrði framvegis endurskoðuð árlega í ljósi samsetningar utanríkisviðskipta árið áður. Áhersla er lögð á að hér er aðeins um að ræða tæknilega breytingu á þeirri gengisvog sem notuð er við daglegan útreikning á gengi krónunnar. Breytingin felur ekki í sér neina breytingu á gengisstefnu Seðlabankans. Markmið árlegrar endurskoðunar á voginni er að tryggja að hún endurspegli ætíð eins vel og kostur er samsetningu utanríkisviðskipta þjóðarinnar, bæði vöru- og þjónustuviðskipta.
Frá og með þessari endurskoðun kemur evran inn í gengisskráningarvog krónunnar í stað gjaldmiðla þeirra Evrópulanda sem urðu þátttakendur í Efnahags- og myntbandalagi Evrópu í upphafi þessa árs. Gjaldmiðlarnir sem falla út úr gengisskráningarvoginni eru finnska markið, franski frankinn, belgíski frankinn, hollenska gyllinið, þýska markið, ítalska líran, portúgalski eskútóinn og spænski pesetinn. Breytingarnar hafa það einnig í för með sér að írska pundið og austurríski skildingurinn eru tekin inn í gengisskráningarvogina með óbeinum hætti í gegnum evruna.
Helstu breytingar frá fyrri vog eru að vægi evru og bandaríkjadals eykst á kostnað breska pundsins, japanska jensins og Norðurlandamyntanna. Aukið vægi evrunnar skýrist að hluta af því að viðskipti við Austurríki og Írland falla nú á evruna en þeim var áður deilt niður á þær myntir sem mynduðu SDR, þ.e. bandaríkjadal, þýskt mark, japanskt jen, franskan franka og sterlingspund.
Nánari upplýsingar veitir Már Guðmundsson aðalhagfræðingur Seðlabanka Íslands í síma 569 9600.
Nr. 40/1999
25. júní 1999