Greiðslujöfnuður við útlönd janúar-júní 1997
Samkvæmt bráðabirgðauppgjöri Seðlabanka Íslands á greiðslujöfnuði við útlönd var 3,2 milljarða króna viðskiptahalli á öðrum fjórðungi ársins. Á sama tímabili í fyrra var viðskiptahallinn 3,8 milljarðar króna. Minni halli á viðskiptum við útlönd í ár stafar af hagstæðari þjónustujöfnuði sem og jöfnuði þáttatekna og rekstrarframlaga frá útlöndum. Vöruskiptajöfnuður var aftur á móti lakari á fyrri árshelmingi 1997 en á sama tíma í fyrra vegna meiri innflutnings fjárfestingarvara en á sama tímabili 1996.
Fjármagnsjöfnuður við útlönd hefur einkennst af auknu innstreymi lánsfjármagns og bættri gjaldeyrisstöðu Seðlabankans. Gjaldeyrisforðinn styrktist um 8,5 milljarða króna á öðrum fjórðungi ársins og samtals óx hann um 3,2 milljarða króna á fyrstu sex mánuðum ársins. Hreint fjármagnsinnstreymi vegna beinna fjárfestinga stafaði að miklu leyti af stækkun álversins í Straumsvík. Erlend verðbréfakaup jukust á öðrum fjórðungi ársins vegna meiri fjárfestinga lífeyrissjóða í útlöndum. Innlánsstofnanir áttu stærstan þátt í öðru fjármagnsinnstreymi til landsins á fyrri hluta ársins með auknum lántökum og lækkun erlendra eigna. Ríkissjóður, sveitarfélög, lánasjóðir og fyrirtæki hafa lækkað erlendar skuldir sínar á þessu ári. Hrein skuldastaða þjóðarbúsins við útlönd var um 227 milljarðar króna í lok annars ársfjórðungs 1997.
Meðfylgjandi tafla sýnir helstu liði greiðslujafnaðar við útlönd, en ítarlegri upplýsingar verða birtar í septemberhefti Hagtalna mánaðarins. Jakob Gunnarsson deildarstjóri á tölfræðisviði Seðlabankans veitir nánari upplýsingar í síma 569-9600.
Nr. 25/1997
18. september 1997