28. ágúst 2014
Upplýsingarit Seðlabankans um verðbréfaeign
Seðlabanki Íslands hefur kannað landaskiptingu erlendrar verðbréfaeignar fyrir árið 2013. Niðurstöður sýna meðal annars að erlend verðbréfaeign innlendra aðila hér á landi nam 1.229,2 ma.kr. í lok árs 2013 og jókst um 147,9 ma.kr. frá árinu á undan, eða um 14%.
Niðurstöður könnunarinnar sýna að erlend verðbréfaeign innlendra aðila var mest í Bandaríkjunum, 281,6 ma.kr., en þar á eftir í Lúxemborg, 190 ma.kr. Eins og í fyrri könnunum áttu íslenskir lífeyrissjóðir mest af erlendu verðbréfaeigninni, en eign þeirra nam 595 ma.kr. í lok árs 2013 og hafði aukist um 46,2 ma.kr. á árinu. Innlánsstofnanir í slitameðferð áttu næst mest af erlendu verðbréfaeigninni, eða 395 ma.kr., og höfðu aukið hlut sinn um 38,1 ma.kr. á milli ára.Einnig var gerð könnun á innlendri verðbréfaeign erlendra aðila og nam hún um 700 ma.kr. í árslok 2013. Eign þeirra var að mestu leyti í langtímaskuldaskjölum, eða um 631 ma.kr. Þeir erlendu aðilar sem mest áttu af verðbréfaeignum hérlendis voru skráðir í Bandaríkjunum. Þeir áttu um 35% af innlendum verðbréfum í eigu erlendra aðila, en þar á eftir komu aðilar skráðir í Lúxemborg með um 34%.
Hér má sjá ritið í heild: Upplýsingarit Seðlabanka Íslands nr. 4.